قارا داغدا یئرین تیتره مه سی
قاراداغلار نییه قالخدیز یئریزده ن نییه اینسانلاری هوپوزا چکدیز
نییه ائولرینی وئران ائیله دیز نییه یوردلاریندا سیز تورپک اکدیز
نییه ایگیتلری توپراغا باسدیز نییه رحم ائتمه دیز بالازا، نییه
نییه باشیمیزا کول اله دیز سیز نییه آهیمیزی قالدیردیز گؤیه
نییه ییخدیز یئره ساخسی گول قابین آخ،باجیم مین نازلا اونو اکمیشدیر
تاخجادان تاخجایا یئرین ده ییشیب یاپراغینی سیلیب نازین چکمیشدیر
اوتاغین دیبینده قالی دزگاهین اوستونده مین دانا خاطیره ایلن
قیز گلینلر سالان ناز، ایلمکلری اوزبه اوز ائیله دین فاجیعه ایلن
قولچاق قوجاغیندا خیرداجا قیزی دیری دیری توپراق آلتدا قویلادین
آلدین سویوق قوجاغینا،سن اونو او،قولچاغی سنده اونو لایلادین
زمینی پیچرکن اکینچی عمی یولونو گودوردو سئوئر اوغلونون
بوائوه گئده نده تئز قاییداردی گؤره سن کیم کسدی یولونو،بونون
بیلمیردی ائو اوچوب کوچه توتولوب اوغلان اؤز کندینده تاپمیر بیرکسی
اوغلانی چکیردی اؤزونه طرف توپراغین آلتیندا بیر آنا سسی
دوواردان بیرتیکه ایاق اوسته دیر توزباسمیش بیرساهات چاققاچاق دئییر
چاغیریر آی.اینسان سئوه ن اینسانلار تئز گلین بوداغلار بالاسین یئییر
قاییدیب کندینه بیر عسگر اوغلان سئوگیسین سئودیگی کوچه نی گزیر
تاپانمیر کوچه نی تانیمیر ائوی آغلاییب آغلاییب دونیادان بئزیر
نئچه ایل یاشاییب بوکوچه لرده نئجه بو کوچه ده ن الینی اوزسون
یاردیمچی سئوگینین جنازه سینی قویاندامزارا او، نئجه دوزسون
کیم اؤز عاشیقینی بو گونه قویار نه یامان وفا سیز داغلار ایمیش سیز
سیز بئله دئییلدیز نه اولدو سیزه ائو ییخیب قاپیدا باغلار ایمیش سیز
بلکه ده قارا داغ.بو صلاح ایمیش تانری نین امرینه نه دئمک اولار
یئنه ده اینشاءا... گؤزه ل لنرسن یئنه سوراغینا گله جک باهار
غم یئمه قارا داغ باشین ساغ اولسون یئنه ده گؤزه لسن یئنه ده گؤزه ل
یئنه دیرچه له جک قالان کؤرپه لر یئنه ده یازاجاق سنه شئعر غزل
یئنه ده سینه نده گزه جک مارال یئنه ده زیروه نه قارتال قونا جاق
یئنه ده قوینوندا بو (شیروان اوغلو) سنه گووه نه جک آرخالانا جاق
۵/۱۳۹۱